نئی دہلی، 27؍اپریل (ایس او نیوز؍ایجنسی)  ہندوستانی انسٹی ٹیوٹ آف ٹکنالوجی (IIT) کے سائنس دانوں نے اب ایک ریاضی کے ماڈل کی بنیاد پر اپنی پیش گوئی پرنظرثانی کی ہے اور کہا ہے کہ  ہندوستان میں کووِڈ 19 کی دوسری لہر کے دوران زیر علاج کیسز کی تعداد 14 سے 18 مئی اورمئی کے درمیان 8 لاکھ تک بڑھ سکتی ہے اور 4 سے 8 مئی کے درمیان روزانہ انفیکشن کے واقعات کی تعداد 4.4 لاکھ تک پہنچ سکتی ہے۔

آئی آئی ٹی کانپور اور حیدرآباد کے سائنسدانوں نے ’سوترا‘ نامی اس ماڈل کا استعمال کرتے ہوئے کہاہے کہ وسط مئی تک انڈر ٹرائلز کی تعداد 10 لاکھ سے زیادہ ہوسکتی ہے۔نئی پیشین گوئی میں آخری تاریخ اور کیسوں کی تعداد میں بہتری لائی گئی ہے۔گذشتہ ہفتے محققین نے پیش گوئی کی تھی کہ یہ وبا 11 سے 15 مئی کے درمیان بڑھ سکتی ہے اور زیر علاج مریضوں کی تعداد 33 سے 35 ملین تک ہوسکتی ہے اور مئی کے آخر تک اس میں تیزی سے کمی واقع ہوگی۔اس ماہ کے شروع میں سائنس دانوں نے پیش گوئی کی تھی کہ 15 اپریل تک ملک میں متاثرین کی تعداد عروج پر ہوگی، لیکن یہ سچ ثابت نہیں ہوا۔

آئی آئی ٹی کانپور کے کمپیوٹر سائنس اور انجینئرنگ کے شعبہ میں پروفیسر منیندر اگروال نے کہاہے کہ مجھے یقین ہے کہ اصل اعداد و شمار کم سے کم اور زیادہ سے زیادہ اعداد و شمار کے درمیان ہوں گے۔اگروال نے نئے کیسوں کی پیش گوئی سے متعلق نئے اعدادوشمار شیئر کیے۔انہوں نے ایک ٹویٹ میں کہاہے کہ عروج پر پہنچنے کا وقت14-18 مئی ہے۔کیسز میں 38 سے 48 لاکھ اور روزانہ نئے کیسوں میں 3.4 سے 4.4 لاکھ کیسزہوسکتے ہیں۔اگروال نے یہ بھی بتایاہے کہ یہ واضح نہیں ہے کہ حتمی اعداد و شمار کیا ہوں گے۔یہ مطالعہ رپورٹ ابھی شائع نہیں ہوئی ہے۔